HIRAETH¹
Ha ka kynta baphyrngab jong ka step, ka jingpah basyiang
jong ka namaz² ka pajut ia nga na ki phohsniew basngewbang.
Nga khih shane nga khih shatai bad khatduh nga liem da lyndang.
Ngam ju iohsngew shuh ia ki sur step ka ïing jong i mei:
ki sim ba ki rwai, ki ñiangkynjah ba ki pah, ki tyngab
ba ki kynkaw, ki khun syiar ba ki kynklob ha phyllaw
bad i madeng ba i pynkhreh ban leit trei sha Simen.
Katba nga khyrwait bad nga ksaid, nga sngewthuh ia ka hiraeth
u Soso uba kwah tang kumno sa shisien ban long u khynnah.
Nga ruh nga kynmaw,nga blaw ia kata, bad ruh ia u syiar kpa,
kumno ka jingkynih jong u ka pynkhih ia ka syngkhor jong nga
bad nga tur khamjan sha i mei ba in ioh kynoi bha.
Na kata ka jinglynga ka hyndai ka per na ki jingrwai
ba ngut nget bad nga iohi ia ki ñi ki kong,
ki meikulong pakulong wut wut ba ki khie
na ki tyrsok ka jingdum mar ia riew u iar banyngkong;
ba ki khrum khrum khram khram ban leit sha lyngkha
ba ki shet ja ban song ia ki ha ki sla. Nga iohi ba ki kieng
la ki wait bnoh ba har har mar syn riew u baar.
Bad nga iohi ba ki mih na la trep, la ki khoh la ki star,
haba riew u balai; ki dongmusa ha la kti ki phyrnai,
ki jingrwai batlem, ki phawar bangja
ki tuid na ki rmiang ha lum ki sawa.
Mynta, ha ka jylli ba shisnem kynthih
bunsien ka jingthiah jong nga ka shah pynkyndit
ha ki azaan³ win thlim, ki bajie shongshit,
ki jingpah huleng, ki jingriew kynsha jong ki reng,
ki lehkmen synñia, ki pataka bahylla,
ki karol buaid, ki jingtem bakyang kum ban pait.
Ia kane ka sor la pynkhapngiah da ki sur bakhyllah.
Kum u syiar kpa, nga ruh, imat
ngam lerkam shuh mynta.